!!لقلمى

حاسه بيك يا قلمى موجوع حزين

حاسه خطك مذبذب .. مش لاقى السطور

نفسك تقول تانى كلام له معنى ومفهوم

بس اعمل ايه لا بايدى ولا بايدك

بس كل الى اقدر اوعدك بيه انى مش هبطل كتابه

مش هسيبك من ايدى واقول مش قادره اكتب

ايدى وعلم فيها رسمك

مرسوم فى تفاصيلها خطك

برتاح لما افضفض بيك ..حتى ولو كلام مش مفهوم

حساك زى صوت انينى مكتوم

كل اللى عندك آهات محمومه..زى الصوت اللى بيصرخ من بين ضلوعى

يمكن حبستك بين صوابعى هى اللى آلماك

زى قلبى تمام ما ضاقت ضلوعى عليه

فاكر لما كتبت بيك الف مره

"اه يا براح عمال بيضيق"

!!فاكر لما قلبى صرخها مع منير

من بعدها لا سمعت لقلبى كلام .. ولا قريتلك كلمه باسمه زى زمان

نفسى ارجع تانى ليك وةنبقى تانى كيان موحد

اللى احسه فى قلبى والاقيه داير فى فكرى

الاقى سنك بيرسمه من غير ما اعدله ولا افلسفه

من غير ما اضبطه ولا اشطب منه كلمه

عارف انت اد ايه واحشنى ؟

رغم انك لسه فى ايدى وانت انت نفس القلم

!!بس بجد كتييييييييييير واحشنى

واحشنى احسك ..واحشنى المسك

واحشنى الاقيك تانى مستقر جوا رسمك بين صوابعى

واحشنى احس انى مش ماسكاك ماسكه عشوائيه

!!!!مش مجرد لانى عايزه اكتب او افضفض

واحشنى تانى اكوننى واكونك

تفتكر فين المشكله؟؟

فيا ولا فيك ولا فى الاوراق؟؟

لا يكون احساسى مات ؟؟

لا يكون سنك خلص؟؟

لا تكون اوراقى باهته؟؟

!!مش لاقيه الاجابه

ولحد ما الاقيها ..هتابع محاولاتى الفاشله فى انى ارجع تانى

اقول بيك من غير ما اعانى

"شكرا ليك لانك مستحملنى اكتب بيك كل سخافاتى دى"