!!لحظات حبيت اسجلها

كنت فاكراها مجرد مشاهد عاديه بعثت فى نفسى التفاؤل

و لكنها لم تكن كذلك

بل كانت؟ ؟ ؟

"انظر آخر البوست"

*

*

*

يوم 17/2 كنت راحه القاهره

اليوم دا انا كنت فى مشكله او يعنى موضوع محتاج قرار سريع وكنت متضايقه اوى لانى مش عارفه اوصل لقرار

"و قبل الرحله"اللى هو الساعه 6

لقيت حصان لونه بنى كله بيجرى بكل ما اوتى من قوه

بيجرى فى خط مستقيم

ومفيش اى حاجه بتوفقه مكانه

"صرخت باعلى صوتى "الله_بصوا

واستغربوا اوى الناس الى كانوا معايا

"ايه مالها دى؟؟

!!ولما بصوا لقوا حصان ازدادت دهشتهم

!!يمكن هو ليهم مجرد حيوان

!!بس ليا انا الحصان هو رمز الشجاعه والقوهوالحب والحنان

"معرفش ليه وازاى ومحدش يسالنى ليه؟"

حسيتنى نحررت بجريه

حسيتنى نفسى اجرى معاه -جنبه من غير ما اقيده ولا احبسه

كان نفسى اعرف نهايه طريقه

بعث فيا يومها احساس غريب بالانتصار والقوه والشجاعه الكافين لاتخاذ القرار

"يا رب يكون قرارى يومها ما جرحش حد"

ويا رب كمان يكون الحصان لسه حر

محدش قيده ولا حجم انظلاقه

وشكرا ليه

* * *

*

* * *

*

* * *

يوم 9/5 دا باه كان عندى شغل كتير اوى

وكنت شايله هم اليوم دا اوى

مراجعه باه وامتحانات ومش فاكر يا ميس ومش عارفه يا ميس والحوارات دى

"وانا فى المعديه"دى للى ما يعرفش اختراع لذيذ جدا بيوصلنا من بورفؤاد لبورسعيد والعكس طبعا وبالتاكيد بنركبها فى اليوم اكتر من مره

المهم كنت ببص للبحر كعادتى دايما

ولقيت حاجه كدا ظهرت فى الميا فجاه

قلت يمكن موجه بتلاعب صاحبتها

وفضلت بصه ناحيتها وظهرت تانى بس لقيتها شئ لم اتوقع حدوثه

!!دولفين

المره دى ظهر بجد وشوفته

ظهر الاول وشه

وبعدين منتصف جسمه

وبعدين ديله

"لقيتنى بضحك اوى ولسه بقول لنفسى "يا بت اعقلى انتى فى المعديه

لقيت الناس الى جنبى كلها بتعمل زيى

!!دولفين ..دولفين

فرحت اوى انه فيه اصلا شاركنى اللحظه دى

و ظهر لتالت مره كانوا اتنين واحد متوسط الحجم والتانى صغنونه خالص

بجد .. كنت فرحانه اوى .. و نزلوا الميا تانى ومش جم

بس كنت فرحانه بيهم اوى

بس يا رب مش يكون حصلهم حاجه من المعديات والمراكب

يا رب يكونوا بامان

وشكرا ليهم

* * *

*

* * *

*

* * *

وتالت حاجه باه

اللى كانت اول البارح

كعادته _يوسف_ فصل النت عننا"طبعا لن يخفى عليكو ان يوسف دا اللى احنا اخدين من عنده النت

اان بهذه المناسبه عايزه كل الناس تدعيله بالهدايا وبانه يسيب النت اكتر من ساعتين بس

"ولو ساعتين وخمس دقايق

المهم طبعا رحت اوضتى وكنت متضايقه

وكالعاده طبعا مسكت قلنى عشان اكتب وزى ما انتو عارفينى وخلاص حفظتونى

كتبت كلام حزين من اللى مالى كيانى

!!وفجأه

مع انطلاق دموعى لتسبق حروفى

سمعت صوت انا بحبه اوى

!!كان صوت مطر

!!ايه دا ازاى يعنى

فتحت شباكى ولقيت قطراته الصغيره بتداعب وجهى

ومديت ايديا للفضا

وبصيت للسما وغمضت عينى

"كان لينا زميل اصله كان معلمنا ازاى نغسل همومنا تحت المطر"

وفضل المطر اكتر من ساعه متواصل مابين قطرات صغيره لا تعرف خطواتها

" ومامتها"

فرحت اوى بيه و داويت احزانى فيه

وقلت له لو دى اخر شتوايه

مش يرجعنى للحزن تانى

حسيت بعد انتهاء المطر بان كل شئ نقى و واضح

وبالتاكيد مشاعرى كمان

حسيت اكتر انى عايزه اكتب واكتب اوى

"احمدوا ربنا باه ان البوست ما طلعش زى اخواته نكد"

*

*

*

عرفتوا كانت ايه المشاهد دى ؟

كانت سلسله من مصالحات الطبيعه

*

*

*

*

*

الحمد والشكر ليك يا رب على كل النعم المبهجه اللى بتقدمهالى

*

*

الحمد لله