محتاجاك أوى فوق ما يتصور خيالك
محتاجه أوى أوضه مافيهاش غير {لمبه و ورق كتير و قلمى و شباك بيبص عالبحر و تليفونى (لمجرد التقليب فى القايمه أو الرسايل أو الصور) و أنا}
نفسى بجد أقعد مع نفسى لفتره طويله أوى مش أقل من شهر
محتاجه أنقى نفسى و أصفيها تانى
"تعبانه أوى أوى أوى نفسى"
يارب إلهمنى الصبر
نفسى بجد أقعد مع نفسى لفتره طويله أوى مش أقل من شهر
محتاجه أنقى نفسى و أصفيها تانى
"تعبانه أوى أوى أوى نفسى"
يارب إلهمنى الصبر
posted by ساعه الغروب at 23.12.08
8 Comments:
دوري علي حد تحسي معاه انك مع نفسك
ساعات بنبقي محتاجين كده اكثر
وانا كمان اوى
وحشانى اوى وعارفة انك مش فى المود زى حالاتى بس بتصل بيكىكتير والله ومش بعرف اجيبك طمنينى عنك يا رودى
وخدى بالك من نفسك ومن قلبك واكيد ان شاء الله ربنا هيكرم اوى
أزال المؤلف هذا التعليق.
يمكن كل شخص بيحتاج حاجات كتيرة
لكن أهم حاجة انه ينفي نفسه
الي أن يصل لمرحلة النقاء
لأن الحياة بتجاربها تترك بنا رواسب كثيرة
والصبر مفتاح الفرج
تحياتي
سلام عليكي يا رضوي
كتير بنحس اننا تايهين و جانا لخبطة و محتاجين لو الدنيا تقف و الصوت حوالينا يسكت و اي التزامات تهرب مننا
هدوووووووووء
عايزة ترتبي اللي جواكي ..انتي لتيها
ورق كتير و اقلام و اكتبي كل اللي جواكي منغير ترتيب
افكار و احلام ..غضب و حزن و ذكريات
و قطعي الورقة
هتطلعي فيها كل اللي جواكي و تقطعيي فيها كل اللي مضايقك
صلي كتير و ادعي ربنا يطم قلبك و يريحك
يا رب تكوني احسن
سلام
مها
حصان برى
ميرسى لتعليقك بس الناس ذنبهم ايه
اجيبلهم اكتئاب معايا
ما هو مش عشان هما اصحابى ازهقهم كفايه انهم مستحملينى
:)
شكرا ليك ويا رب تكون بخير
عارفة ايه اللي بيحصل يا رودي؟
اننا كتير بنطنش الهم
و نسد و دانا و نقفل قلوبنا وعيونا
ونقول مش حانسمع ولا حانشوف
وحانعدي الايام يعني حانعديها
ومش حابكي كل يوم كفاية عياط
ومش حاشتكي لحد كفاية نكد
ومشس حافكر أساسا كفاية عذاب
وننجح في ده كله
ويعدي شهر و اتنين و يمكن تلاتة
واحنا قافلين كل الطرق دام الهموم
بس مين قال انها قليلة الحيلة ؟
لا ده بتفضل قاعدة جوانا
من غير لا حس ولا خبر
بتكبر و تبني عواميدها
وتكسر و تبوظ حاجات غالية
واحنا فاكرين الايام بتعدي على خير انها بعيييد عننا
ويشوفونا يقولولنا انت انهاردة أحسن
وتضطري تقولي آه الحمد لله أحسن كتير
وفيه حاجة جواكي بتعيط
بتعيط على حاجات بتتكسر
وانت ولا عارفة فين اللي بيعيط ده
ولا ايه بس اللي اتكسر
عشان كده بنحس فجأة اننا عاوزين نبعد عن كل حاجة
و نقعد في اوضة مع شباك و قلم
عشان نشيل ادينا اللي سادين بيها ودانا و نفتح عنينا و قلوبنا
ونفتح للهم بيبانا عشان يخرج و يبطل تكسير و حفر
يخرج بقى بكتابة ولا عياط وتوريم عيون ولا صراخ
أهو المهم يخرج
والاوضة الفاضية اللي مش لازم أطلع منها على الشغل أو مش حايطل علي فيها حد.. حاتسمحلي أفكر و أعاتب نفسي و أهاجمها
و أفتكر ايه اللي ضاع منها و أتحايل عليه يرجع
و أستغفر ربي و أناجيه و أقوله يسامحني عن سد وداني و عنيّ
وأفكر نفسي باللي كانت عليه و أرجعها
وبعدها أفتح باب الاوضة و أخرج
و أقف هناك تاني وسط الكل
وسط الأيام و الاحداث
فاردة طولي و فاتحة عيوني وقلبي
بيتهيقلي هو ده اللي بيحصل
بس فينها الاوضة
وفينه الوقت
وامتى الايام حاتهدى؟؟
أنا طولت قوي
ونسيت نفسي و اتكلمت
كل ده من الاوضة بتاعتك و القلم و الورقة
بس حاسة انك قريبة جدا يا رودي
hannoda
انا لو كنت قلت فى اخر البوست ادخلى اشرحيه يا هنوده ماكنتيش برضو هتعرفى تعملى دا بالوضوح دا
انتى وصفتى اللى انا حساه بالظبط بس انا عارفه انه قلمى مخاصمنى ومش عايز يعبر ولا يكتب
انتى بجد عرفتى اوى اوى اوى انا كنت حاسه بايه و ازاى وليه حسيته
كنت عماله ادوس عليا اوى واقول هقدر وهكمل ما ياما حصل واستحملت لحد ما وصلت لنقطه انى فرملت جامد اوى وقلبت كل حاجه حلوه او حتى وحشه كانت فى حياتى
ما قدرتش احوش حاجه من انها تقع او تبعد غير الحاجه اللى كانت نفسى بجد
بجد يا هنوده مش عارفه اقولك ايه
بجد ميرسى اووووووووووووووى
انتى مش متخيله انا مبسوطه اد ايه انه حد فسر كلامى اللى انا كتبته دا
صح
ميرسى يا هنوده اوى اوى اوى اوى
وانتى تطولى براحتك يا قمره
وبرضو ما عنديش غير الحمد لله اناالنهارده احسن
:)
إرسال تعليق
<< Home