مع اول الشتا
ببقى فرحانه مووت انه الشتا رجع تانى
وجالى ياخدنى فى حضنه الدافى رغم برده تانى
ورجع مطره يداوى كل جروحى تانى
وبحره العالى بموجه اللى ما بيبطلشى تلاطم بيتحاور معايا
وصوت منير وايمان البحر درويش باغانيهم الغريبه اللى بتهز كل كيانى
ويخلوه يثور عليا ويقولى قومى ..اجرى ..العبى ..وبطلى كسل
انتى كويسه وبخير انتى بس زعلانه منك لسبب عبيط
قومى وانفضيه من فوق كتافك
اه بيكلمنى الشتا بكل معانى الجمال اللى فيه
بريحه شبابيكه الخشب وطلعه شمسه المكسوفه المداريه ورا سحابه مليانه مطر
وبحره العالى الى صوت موجه بيطربنى
*
ياااااااااه
***
**
كان واحشنى الشتا اوى بكل ما فيه
بجد كان واحشنى اوى
*
يا رب ديم عليا احساسى بالسعاده دا لاخر الشتا
بحبه اوى ومش عايزه اضايق فى وجوده
عايزه زى كل سنه
اشتاقله
واشتاق لحنينى لكل ما فيه جواه
*
الحمد لله
posted by ساعه الغروب at 11.12.07
22 Comments:
السلام عليكم ورحمة الله وبركاته
...........................
رودى اولا ازيك يا اجدع بورسعدية
اول مرة بجد اشوف انسان من جواه من خلال كتاباته انتى كده بجد
البوست الى فات مثلا اقسم بالله انى مكنتش عارف اعلق اقول ايه من كتر مصدقيتك فى التعبير عن الى جواكى
بجد ربنا يكرمك ويحققلك كل الى بتتمنيه ...
على فكرة انا كمان بموت فى الشتا اوى
وبموت كمان فى المطر .. تعرفى لما كنا عندكم فى بور سعيد كنت بدعى ربنا انها تمطر والله بجد كان نفسى تمطر جدا جدا والحمد الله ان ربنا استجاب ومطرت وانا على البحر كمان وكانت حاجة ممتعة جدا وشعور جميل جدا جدا
تحسى ان المطر بيغسل الواحد من جوا وبيطفى نار اى هموم أو آلم بنحس بيه
بجد بجد مفيش اجمل من ده جو الواحد يحس بيه بالفرحة
بجد ربنا يكرمك ويخليكى لينا يا اجدع أخت فى الدنيا
تحياتى :)
ايه ياعم يوسف طيب انا كنت جاي اقول كده:)
بجد يا رضوي بساطه تعبيرك
بتميز كتاباتك بطعم تاني
بريحه شبابيكه الخشب وطلعه شمسه المكسوفه المداريه ورا سحابه مليانه مطر
يا راااايق انت
:)تعرفي يا رضوي
انا اصلا ادمان عندي اسافر اسكندريه في الشتا
اقعد قدام البحر
:) واتنح
شويه واقوم ارقص
البحر في الشتا له سحر تاني خالص
تعرفي يا بنتي برغم كل الحزن اللي بيبان جواكي
يمكن انتي اكتر واحده فينا بتحاربيه
شتا سعيد ان شاء الله
عارفة يا رودي
بحس انك صادقة اوي مع نفسك
بس عارفة تاني
انا مش بحس اني عايشة الا وانا في الشتا
لان دة كان عشقي الاول والاخير
بتمني الدنيا تمطر عشان انزل الشارع وامشي تحتيه
بتمني حاجات كتير اوي فيه
وكنت بتمني جوازي برضه فيه
بس الشتا السنة دي عندنا هنا بيستهبل
كله شمس وحر وتراب
عايزة احس الشتا اللي بجد شان يمكن الاقي نفسي من تاني
وحشاني
جميل و موثر و رائع بجد البوست ده
شكراً على كلامك بجد
و مش هتبقى اخر زياره ليا عندك
أتمنى تزورينى فى مدونتى
انتي عسولة قوي على فكرة
ربنا يسعدك على طول
على فكرة...كلامك بيفكرني بيا قوي قوي
ربنا يسعدك يارب
ويخلي كل فصول السنه حلوه ليكي
أنا كمان بحب الشتا جدا وبستناه من السنه للسنه
تحياتى لكى
امبارح و احنا مع بعض .. حسيت كلامك ده أوي .. آد ايه الشتا ده حب بيدخلك من كل الأماكن .. يدخل و يتسرسب يلمس قلبك بنفضة عجيبة .. تلمع عينك .. تضمي ضلوعك على بعض خايفة يروح البرد .. و يرجع قلبنا تاني يحس بحر الوحدة و الطبطبة على أملك إللي أكيد و لازمن جاي ..
جميلة إنتي يا رودي ..
دمتي لنا .. و دامت صداقتنا ..
al slamo 3likom
we kol 3am we enti b7'er
ahmed a.aiz
عندك حق فعلا مفيش اجمل من دفي برد الشتا فعلا الشتاء فصل جميل جدا كل سنة وانتي طيبة
لما الشتا يدق البيبان
الشتاء هو فصل الحب
علشان فيه بنشعر بالدفئ
تسلم ايدك على البوست
الله
حلوه اوى اوى
بصى بقى على البوست ده
http://tar7-elba7r.blogspot.com/2007/08/blog-post_20.html
بريحه شبابيكه الخشب وطلعه شمسه المكسوفه المداريه ورا سحابه مليانه مطر
وبحره العالى الى صوت موجه بيطربنى
سحـر غرييب
عارفه دايما بحس اني باخد الشتا في حضنى
وبحسه داافي اوى وزي ما حستيه
:)
yhyيوسف المصرى
ميرسى بجد على كل كلمه انت كتبتها
والحمد له انك اتبسطت وانت هنا و روحت مبسوط من عندنا
ويا ريت تبقوا تكرروها زى ما وعدتونا
شكرا ليك بجد ومنتظره تعليقاتك يا سيدى
ربنا معاك ويكتب لك كل خير
؛)
*-*-*-*-*-*-*-*-*-*-*-*-*-*-*-*-*-*
حصان برى
حبك للبحر ولاسكندريه
دا لازم تحمد عليه ربنا لانه ناس كتير اوى لا بتفهم البحر ولا بتعرف تتكلم مع الطبيعه
فبجد انت لازم تحمد ربنا على دا لانى واثقه انه بتمشى من عند البحر وانت مرتاح الف مره عما جيتله
حافظ على دا جواك
على سحر الشتا واحساك بيه
شكرا ليك بجد على الجمله الاخيره
ربنا معاك دايما ويوفقك لكل ما فيه الخير ليك
ميرسى ليك جدا
amr ahmed
شكرا ليك
ويا رب السنه كلها ليك تبقى سعيده
:)
*-*-*-*-*-*-*-*-*-*-*-*-*-*-*-*-*-*
samraa alnil
يا ستى لو عايزه تحسى بالشتا بجد تعالى و وفى بالزياره اللى انت واعدانى بيها من زمان
؛)
يا رب بجد تحققى كل حاجه ببتمنيها ويا رب دايما تكونى بخير
طمنينى عليكى لانك واحشانى اووووووى اوووووووووووووووى
:)
شريف طلال
شكرا لكلماتك الجميله دى بجد
ويا ريت فعلا ما تبقاش اخر زياره ليك هنا
شكرا ليك
*-*-*-*-*-*-*-*-*-*-*-*-*-*-*-*-*-
بيسوو
انتى اللى رقيقه اوى على فكره
ميرسى ليكى يا عسل ويا ريت تكررى الزياره تانى
شكرا ليكى اوى اوى اوى بجد
:)
esraa
شكرا ليكى بجد جدا ويا رب تكونى انتى كمان سعيده اووووووى طول السنين
ربنا يكتب لك كل ما فيه الخير ليكى
*-*-*-*-*-*-*-*-*-*-*-*-*-*-*-*-*-*
bos bos
كل الناس الى بتفهم اوى بتحب الشتا اوى
وانتى حد بيحس اوى وبيفهم اوى
ربنا معاكى
وشكرا ليكى جدا على المتابعه والرد
:)
rosealia29
يااااه يا نهى بجد مش عرافه اقولك ايه فعلا
كلماتك بجد ابلغ 100مره من البوست
"تضمى ضلوعك على بعض خايفه يروح البرد
الله بجد يانهى
فعلا يا نهى ربنا يديم اللى بيننا دا اوى
ربنا يسعدك اوى اوى اوى
ميرسى ليكى جدا بجد
*-*-*-*-*-*-*-*-*-*-*-*-*-*-*-*-*-*
lion king
شكرا ليك
وكل عام وانت بالف خير
:)
sendbad
هو كدا فعلا
دفا برد الشتا له سحر تانى و بيبقى له معنى خاص اوى اوى
شكرا ليك
و وانت طيب
*-*-*-*-*-*-*-*-*-*-*-*-*-*-*-*-*-*
احمد رفعت
تسلم ايدك انت على التعليق
شكرا ليك
:)
tar7elba7r
شكرا ليك
ومنتظره زيارتك
:)
*-*-*-*-*-*-*-*-*-*-*-*-*-*-*-*-*-*
فوكيره
بجد فعلا الشتا بيقى له رونق تانى خالص غير كل الفصول
ربنا معاكى ويكتب لك كل ما فيه الخير ليكى دايما يا رب
إرسال تعليق
<< Home