عايزه اروح المدرسه
اه انا عايزه اروح المدرسه
عايزه اقابل اصحابى كل يوم
عايزه اقف فى الطابور واغنى لمصر
واغنى اغنيه عن معنى الصداقه
واقول لاصحابى عملت ايه البارح فى الواجب اللى كان كتير اوى
وانى كتبته بخط وحش لانى ما كنتش لاحقه اخلصه
واقولهم انهم وحشونى فى يوم الاجازه
واقعد جنب صحبتى اللى بحبها اوى
واديها قلم زى اللى اشتريته البارح لنفسى
ولما تيجى الفسحه نحط مصروفنا على بعضه
ونجيب حاجات زى بعض
وناكل سندويتشاتنا وبعدين نلعب مع اصحابنا
ونطلع تانى نكمل حصصنا
وناخد ايه كريمه او نص صغنون
يعلمونا ازاى نتصرف
وجمله جميله بالفرنساوى معناها بحب اصحابى
وناخد رسمه فيها طفوله وفيها براءه
وناخد حصه موسيقى نعزف فيها لحن نشيد بلدنا
وفى اخر اليوم
اسلم على اصحابى
واجرى لبابا ياخدنى فى حضنه
واسلم على الدادا الطيبه واديها بونبونايه صغننه من اللى انا اشتريتهم
واروح اسلم على ماما
واتغدى وانام
واصحى اعمل واجبى واحفظ الايه الكريمه او النص الصغنون
والجمله الجميله عن معنى الصداقه
واورى لبابا وماما الرسمه
واحكى لهم على حصه الموسيقى
وعلى اللى عملناه فى الفسحه
وادخل انام بعد ما ابوس بابا وماما
من غير كوابيس
وانام على طول من غير تفكير
واصحى وانا كلى نشاط لبكره الجميل الجديد
اللى هقابل فيه اصحابى الطيبين اللى بحبهم اوى
**--**--**--**
وحشتنى اوى الحصص
وحشنى اوى الاساتذه
وحشنى جرس الفسحه
وحشنى طابور المدرسه
ووحشنى اوووووى الواجب
وحشتنى الصور والاقلام الالوان اللى كنا بنسطر بيها الكراس
الله... بجد يا ريت كنا نقدر نفهم معانى كتير اوى فى الايام دى
كان عقلنا يمكن صغنن
بس فرحنا كبير
لان همنا صغنن وحلمنا جميل
posted by ساعه الغروب at 16.11.07
25 Comments:
السلام عليكم
...........
الله يخرب بيت عقلك يا رودى
ايام جميلة ..وأنا فى ابتدائى كنت طفل كئيب اوى :( ديما مع نفسى كده وعايش الحياة !! بس مع ذلك كانت ايام جميلة اوى مقدرش اوصفها غير (أيام الهدوء)بعد كده بقت الحياة دوشة اوى
بوست جميل يا رودى اوى
:D:D:D:D:D:D
تحياتى
و أنا كمان يا رودي .. بحن أوي لأيام المدرسة .. و لبس المدرسة .. و هم المدرسة إللي دلوقتي بالنسبالي ياريت كل هموم الدنيا انهرده كانت هموم المدرسة زمان .. و صحيح على رأيك كان أقصى حاجة ممكن تتعبني إني كتبت بخط وحش .. او محفظتش القطعة المطلوب مني أحفظها .. ياااه يا رضوى .. بجد بجد بوست في الصميم .. و على الجرح ..
ألف شكر ..
yhyيوسف المصرى
ليه طنت طل كئيب؟
هههههههه
انت بس طيوب شويتين تلاقيك كنت بتقعد فى حالك كدا زى ما انت دلوقتى
فعلا كانت ايام الهدوء
كان الواحد زهنه صافى اوووووووى
يلا الحمد لله
بس يا رب الدوشه ما تزيد عن كدا
ميرسى ليك
*-*-*-*-*-*-*-*-*-*-*-*-*-*-*-*-*-*
rosealia
فعلا يا نهى بجد يا ريت كان كل هم الدنيا زى هم الواجب
الحمد لله
ربنا يخليكى يا روزا
:)
عـارفه يا رودى بجد اجمل متعه كـانت في المدرسه
انى كنت بلعب واجري واسوق العجله واقلب الدنيا من غير حسـاب
اى نعم انا طفولتى يقال عنها انها كانت طفوله مشرده او مستولده
اى حاجه غير الهدوء
والله يا رضوى البوست اخدنى بعييد
عماله افتكرنى واضحك ... عارفه لما بمشي من شارع مدرستى
بسرح ... وبقعد افكر كتيير
بوست حلو اووى يا رودى ومن جوه ...
ياه كانت ايام جميلة والواحد ماكانش حامل هم حاجة
تحياتى لكى
ديما الواحد بيحن لاايام زمان ونفسة ترجع وترجع اجمل زكريات
ربنا يوفقك
تحياتى
ياااااه ايام كنا ساعتها بنحلم نكبر قوي فيها ودلوقتي بنتمني ثانية من اوقاتها عجبي على اننا تنمنى ان نعيش زمن غير زماننا وبمجرد حدوثه نتمني العودة
فوكيره
فعلا يا مى بجد كنا بنتعامل من غير حساب
بنتعامل زى ما بييجى على بالنا
مش كل حركه بقيد والف الف فكره وموضوع
يا ريت بجد لو نعيش يوم من ايام زمان دى باحساسها الكامل بس بعمرنا دا
عارفه المشكله فين ؟؟
اننا كل ما بنكبر زياده كل ما بنلاقى الايم اللى فاتت انقى واروق اووووى
الحمد لله
:)
*-*-*-*-*-*-*-*-*-*-*-*-*-*-*-*-*-*
bos bos
اولا ميرسى ليكى
ثانيا
هو فعلا كدا كنا عايشين وبس
مستنيين يوم الاجازه عشان نخج ومستنيين اللعبه الجميله اوى اللى ختيجى لما نجيب درجه حلوه
بجد كانت ايام جميله اوى
شكرا ليكى
:)
tamer nabil
يكفينا منها الزكرى اللى بتعيشنا سعداء ولو لحظه
*-*-*-*-*-*-*-*-*-*-*-*-*-*-*-*-*-*
truelove
هو فعلا احساس غريب بس ما هو جاهين قالها
لا تجبر الانسان ولا تخيره
يكفيه ما فيه من عقل بيحيره
اللى النهارده يطلبه ويشتهيه
هو الى بكره هيشتهى يغيره
وعجبى
:)
:)
صحيح و الله
الواحد كلما مضى به الزمان كلما اشتاق الى الماضى بحنيته و حنينه
تحياتى اليكم
تسرنى زياره المدونه
ابو مفراح
يخرب بيت شيطانك
هيه كانت ناقصة دى بصراحة
وتبقى جملت
ندمينا ندمينا على اللى عدى ندمينا
بجد نفسنا كلنا نرجع تانى
ولو حتى سنه
السنه إللى بتعدى مش ممكن ترجعة تانى
علشان كدة المفروض نعيش اليوم بتاعنا بس
مش مهم بكرة ولا مهم إمبارح
المهم دلوقتى
عادى بقة
أودى
ياااه يا رودي
وأنا بقرأ البوست تخيلت كل اللي حكيتي عنه
أول حاجة افتكرتها هو الحوش وبعدين الفصل و بعدين كل زميلة تختة قابلتها على مدى السنوات
كنت بحب قوي لمتنا و احنا طالعين على السلم بأعداد كبيرة بعد انتهاء الطابور
وبجد كنت بحب قوي النشيد بالذات ياأحلى اسم في الوجود
وكل ما أفتكر اليوم اللي قبل أ,ل يوم دراسة بعد أجازة الصيف الطوييييلة اللي بمل جدا في آخرها
بحس بنفس الاثارة و اللهفة الي ماكنتش بتنيمني طول الليل و أنا عمالة أتخيل السيناريوهات لأول لقاء بيني و بين كل صحابي
كانت أيام أجمل ما فيها هو الانطلاق و البراءة العجيبة
البوست مليان مشاعر كتير يا رودي استغربت لما لقيني بتشدلها قوي مع القراية
ولا كنت أتوقع اني واحشني الأيام ده بالشكل ده
:)
اد كدة الايام كانت جميلة لما كنا يدوب بنعرف نحب الناس كلها من غير ما نسال انت مين ومنين وليه كانت الحياة بسيطة ومفرحة
تفتكرى مش فى ايدينا نرجع زمان حتى لو فى الاحلام ومن غير كوابيس؟
alaaaaaaaaaah
kant a7la ayam bgdddd
w shaw2tini leha awy lma 2arit el post
kant kol 7aga basita w gamila w bari2a....bas harg3 w a2olk kol mar7la w leha 7lawtha :)
w wa2ta bardo kant btday2na 7agat..bs elfar2 enna dlw2ty wa5din balna menha w merakzin feha !!
post to7faaaa bgd estmt3t beh :)))
آآآآآآآآآآآآهـ .. من ]أخذ عمر كللله ، ويعيد الطفل والجهل القديما !!!!!
آآآآآآآآآآآآهـ ...
فكرتيني يا رودي، وأنا مش ناسي !!
بس واحشني قوي !
أهي حاجة، من اللي مش ممكن ترجع ، زي إيه ؟؟؟؟
انا مكنتش بحب المدرسة
ومكنتش بحب الفسحة
ومكنش ليا اصحاب نحط مصروفنا علي مصروف بعض عشان نشتري الحاجة زي بعض
ومكنتش بحب الواجب والطابور وتحية العلم
ومكنتش بحب الصحيان بدري ولا زلت
عشان كدة تلاقي البوست ده اثر فيا قوي لانه لم كل حاجة انا مكنتش بحبها وانا صغير
الله يا رودى
عجبنى اوى اوى البوست ده
بفكر كتيير اوى فى كل الكلام ده
ونفسى بجد ارجع المدرسة وترجع ايامها
كانت كل حاجة فى الحياة بسيطة
وكانت كل همومنا ومشاكلنا بسيطة
واحلامنا كمان
مع ان ذكرياتى فى المدرسة مكانتش بالبراءة اللى انتى كاتباها دى
بس يمكن علشان الاولاد بيبقو متشردين شوية
:D
ميرسى عالبوست الجامد
والريفريش اللذيذ
:)
والله انا كمان نفسي الايام الجميله دي ترجع
عارفه لما بسمع الطابور في اي حته عنيه بتدمع
قول للزمان ارجع يا زمان
ابو مفراح
شكرا ليك جدا
ويا رب اللى جاى يبقى افضل من زكرايات الماضى كمان
شكرا ليك ويا ريت تكرر الزياره تانى
:)
-*-*-*-*-*-*-*-*-*-*-*-*-*-*-*-*-*-
ody911
وليه نندم مهما كان
سواء اللى عدا دا كان حلو او وحش افتكر انت بس اللى عرفته و اتعلمته منه
اما اننا نعيش النهارده بس دا انا معاك فيه
الى حد كبير يعنى
ما ساعات فيه ناس بتضيع جمال االلحظه بانها تفتكر الوحش اللى مرت بيه بس
ودا فعلا مؤذى اوى
يا رب كل ايامنا تبقى للافضل دايما
ربنا معاك ويوفقك لما فيه الخير ليك دايما
ميرسى ليك
"تعليقك كان صادق اوى على فكره"
:)
قول للزمان ارجع يا زمان
honnoda
كانت فعلا ايام حلوه اوى يا هنوده
ويمكن اللى خلانى افتكرها اوى كدا وغير على الايام دى الولاد اللى عندى لما بلاقيهم بيعاتبوا بعض ى حاجات صغنونه اوى ومتخاصمين عشان حاجات طيبه اوى
فعلا ببقى نفسى اوى اقولهم انا اد ايه نفسى ارجع تانى فى السن دا واعيش كل ما فيه
بجد بجد كان اجمل سن
يا رب كل الى جاى يبقى جميل كدا بنقاء الايام دى
ربنا معاكى ويا رب تكونى بخير
:)
*-*-*-*-*-*-*-*-*-*-*-*-*-*-*-*-*-*
sokomonoce
يمكن فى ايدينا نعمل كدا ولو للحظات بس مع الناس القريبين مننا اوى لانهم هما اللى هيبقوا فاهمينا وحاسيين زينا
او فى احلامنا اللى يمكن يكون لسه فيها من النقاء شئ
يا رب بجد كل ايامنا تكون ببساطه الايام دى
شكرا ليك
:)
oma
فعلا
بسيطه
جميله
بريئه
يمكن تكون مشاعر او احاسيس افتقدناها اوى الايام دى
يا رب بجد نقدر نحافظ على اللى جوانا الايام دى اكتر شويه من كدا
ويا رب كل اللى جاى يبقى زكرى حلوه اوى فى يوم من الايام
شكرا ليكى وشكرا بجد اووى لمتابعتك
:)
*-*-*-*-*-*-*-*-*-*-*-*-*-*-*-*-*-*
ابراهيم...معايا
انت فين يا راجل
غايب من بدرى
فيه فعلا حاجات لما بتروح مش بنعرف نلاقيها تانى
بس عزائنا الوحيد انه الزكرى بتبقى لسه حنينه علينا وبترجع لنا كل لحظه حلوه مرينا بيها
شكرا ليك
ويا ريت ما تتاخرش تانى كدا
:)
احمد عيسى
الحقيقه تعليقك انت اللى اثر فيا اوى
شكرا ليك
بس شوفلك اى زكرى من المرحله دى على الاقل عشان لما حد يسالك انت كنت طالب عامل ازاى يعنى
هههههههههههههههه
شكرا ليك
:)
*-*-*-*-*-*-*-*-*-*-*-*-*-*-*-*-*-*
zordeak
شكرا ليك انت بجد
بس ما اعتقدش انك كنت حد شقى اوى كدا يعنى
شكلك كنت طيب برضو
انت ما ينقعش تبقى حد شقى اصلا
:)
:)
نهر الحب
فعلا اان بجد بشتاق اوى انى اسمعه حتى ولو عن بعد من غير ما اكون حاضراه
شكرا ليكى
ويا رب تكونى بخير
*-*-*-*-*-*-*-*-*-*-*-*-*-*-*-*-*-*
احمد رفعت
ياااه لو بنعرف فعلا نقول للزمان يرجع وهو يقدر يرجع بينا
دا احنا كنا هنزهقه معانا
ههههههههه
يا رب تكون بحال افضل
ربنا معاك
وشكرا ليك
:)
همممم
بس انا ما وحشتنيش المدرسه
وما وحشتنيش عصاية استاذ ندا بتاع العلوم اللي كان عايزني اخد عنده درس
وماوحشتنيش حصة الالعاب اللي المدرس كان بيخليني اجري فيها قوي وما العبش
بس وحشتني لمة صحابي بين الحصص
وحشتني لمة صحابي واحنا مروحين
وحشتني السندوتشات بتاعة امي الله يرحمها واللي كنت بافرقها على العيال
تصدقي .. المجمل كده .. كانت ايام حلوه
ملحوظة
فين برطمان الفيسكافيه؟؟؟؟؟
سلاموووووووووووز
إرسال تعليق
<< Home