أنا كويسه والله

انا كويسه .. والله العظيم كويسه
اقسم بالله كويسه
اقولها ازاى يعنى .. اغنيها مثلا ؟؟

ناس كتير مش بتصدقنى لما اقول انى كويسه
هو أنا لازم أبقى منهاره او عندى حالة يأس أو بعيط ليل ونهار

لأ انا الحمد لله كويسه..ربنا أنعم عليا بتجربه الورم الحميد دى عشان أعرف انى كويسه اوى اوى اوى وعشان اتاكد انى ماليش غيره

لانى فى الفتره الاخيره قبل مرضى دا ماكنتش بعمل واجباتى الدينيه صح كنت تايهه اوى
بس الحمد لله ربنا قاللى بطريقته انه لسه عايزنى
اختارنى انا من بين عباد كتير اوى يمكن يكونوا حتى افضل منى كتير بس هو بفضله ورحمته الواسعه اوى اختارنى انا عشان يسمع تانى صوتى وندايا
وقاللى لسه قدامك الفرصه ترجعى تانى وافضل مما كنتى كمان
حسيت انه ربى بيقولى انا هنا و بمدلك ايدى هتسيبينى وتلتفتى لعبادى تانى ولا هتفضلى هنا وفاكرانى وبتعملى اللى عليكى صح

ربنا لما جابنا الدنيا دى جابنا عشان حاجتين :عمبلنا وعبادته
والحمد لله الاتنين دول بفضل الله دلوقتى بعملهم بالطريقه اللى ترضينى واعتقد انها بترضى ربنا
يبقى ليه ما ابقاش كويسه؟


:)


فالحمد لله جدا جدا

وشكرا لكل حد كان بيسأل بجد وباهتمام عشان يطمن
وبرضو شكرا لكل حد كان بيسأل لمجرد السؤال

:)

انا بجد الف حمد وشكر لربنا
كويسه اووووووووووى