هرجع تانى

أنا هرجع تانى يا مدونتى
محتاجه اوى أتكلم هنا
وبما انه محدش بيقراكى حاليا فيبقى ممكن اكتب كل اللى نفسى فيه

الحج "تجربه جميله"ألف حمد وشكر ليك يا رب

تجربه جميله اوووووووووووووووى
ربنا ينولها لكل مشتاق لها يا رب

حاسه بعد ما رجعت بأن نفسيتى مرتاحه اووووووى ومطمنه مهما اى حاجه حصلت

مش عارفه اوصف اللى عشته دا او اللى حسيته رغم الزحام الشديد وانه كان بيحرمنا من متع جميله بس بردو الحمد لله استمتعت نفسيا جدا
كل اللى بقدر اقوله انه الحمد لله وميرسى لجوزى انه اصر فعلا انى اروح حتى ولو كنت لوحدى بس المهم انى أؤدى فرضى


اللهم لك الحمد والشكر كما ينبغى لجلال وجهك وعظيم سلطانك
وميرسى ليك يا كل دنيتى

بوست جديييييييييييييييييييييييييييييد

بقالى كتير اوى ما كتبتش اى حاجه ويمكن فى اجندتى الخاصه كمان
بس حسيت انى نفسى اقول كلام كتير اووووووووى ومش عارفه ابتدى بايه منه

اصله الاحداث كانت كتيره اووووووووووووى
جوازى ...الحمد لله
وسفر جوزى بعد كدا ورجوعى تانى لبيت بابا على ما ابقى اسافرله
وبعدين سفرى انا لهنا اللى لسه مش عارفه اتعود عليه

واللى تقريبا مستحوذ على تفكيرى دجلوقتى وما اقدرش اكتب عن اى حاجه تانيه غيره

كل حاجه وحشتنى
اهلى واصحابى واوضتى وكتبى واقلامى
والاطفال الى كانوا عندى فى الكورسات
الشوارع ودخول الشتا وريحه البيوت فى الوقت دا من السنه
حتى الناس اللى ما اعرفهاش شخصيا بس كانت بتجمعنى بيهم المعديه وحشنى انى اشوفهم
اما البحر فبجد مفتقداه جدا مفتقده صوت موجه هنا البحر صامت زى اهل البلد دى بردو محدش بيتكلم
و الموج رايح وجاى بس من غير صوت تحس كانك عامل الاصوات سايلنت
نفسى اسمع كل الدوشه اللى كانت بتضايقنى تانى
الناس اللى بتزعق واللى بتحكى فى الشوارع واللى بتتكلم فى كل واى حاجه تقابلها
كنت زمان بنتقد الحاجات دى بس لما جيت هنا وعرفت يعنى ايه انه الواحد يعيش بلا روح او يفتقد روح كل حاجه حبيت الحاجات دى اوى

بجد ومحتاجه اعمل ريفريش وارجع تانى اشوف الحاجات دى واعيش معاها وبيها
يلا الحمد لله

عموما دا بوست مؤقت على ما ابقى اجمع افكارى واكتب حاجه معقوله
وتقريبا البوست الجاى هيبقى عن المسلسل الفظيع والمريع "لا لولا" مش قادره اقاوم ومااكتبش عنه
الحقيقه مسلسل يستاهل الحرق

كل الحاجات بتفكرنى !!

لا البحر بقاله ريحه ولا صوت
موجه بيروح وييجى بس ماعادش حتى بيتسابق
و رغم ان الجو عندنا بقى شتوى جدا
بس حتى الكام مره بتوع الشتا والمطر كان لهم احساس زمان ولا سابوا اثرهم فى ريحه الخشب ولا الشوارع الا دقايق معدوده و بيرجع بعدها كل شئ كأنه لم يكن
دا حتى الشتا نفسه معاند ومش راضى ييجى ويستقر
ولا حتى النورس بقاله صوت صيحاته اللى كانت بتحسسنى بالتحرر
وحتى الخيول عيونها حزينه مش حره هى كمان
تفتكر انا اللى مش عارفه احس الحاجات دى وهى فعلا لسه زى ما هى و غيابك عنى
مفقدنى احساسى باى حاجه تانيه غيرك فمش عارفه احسها

اكيد اه..صح..ما هو اصل غيابك قبل وجودك كان صعب اوى بس لقيته اصعب آلاف المرات بعد وجودك
يعنى لما كلمت الموج حتى ولو بهزار وانت معايا حسيته مبسوط و لما اتمشينا فى كل مكان حسيته بيكلمنا اما دلوقتى لما بمشى فى شارع من دول لوحدى بحسه بيسألنى عنك
ولما بجاوبه بيقولى ربنا يرجعه ليكى بالسلامه ومش يحرمك منه أبدا

بجد بحس بكل مكان بيحس بخاطايا عليه حزين مش مبسوط وفرحان زى ايام ماكنت معايا
وبصراحه انا اصلى بتعمد امشى فى كل مكان رحناه عشان بلاقى كل كلمه ونظره بتتكرر تانى فببتسم بهدوء وبدعيلك ربنا يهون الأيامى عليك ماهو ما باليد حيله

بجد ربنا يرجعك ليا بالسلامه لان غيابك عنى مغيبنى انا كمان عنى
مش بلاقينى ولا ابتسامتى بترجعلى الا برناتك و بسماع صوتك
بجد أنا بحبك اوى يا اغلى من عمرى عندى
بحبك أنا يا أجمل شئ حصللى من مليون سنه
ربنا يحفظك ويهون عليك غربتك ويرجعك ليا بالسلامه

**
*
**
*
**

كل الحاجات بتفكرنى
بعيون حيرتها تحيرنى
والذكرى مش بتصبرنى
تمر صورتك اتبسم
والابتسامه تعذبنى
**** **** ****
وقلبى من بعدالطيران
ماحيلتنه الا جناح مكسور
دلوقتى مهما اقول الأه
وانت بعيد مين يسمعنى
**** **** ****
كل الحاجات كانت
تضحك لما اقابلك
لا عرفت نفسى من بعدك ولا من قبلك
قبلك ماكنليش ولا حاجه
بعدك سنينى محتاجه
يا ريت تشوف دمعة عينى لما بغنى
**** **** ****

بحبك

ما كنتش اعرف زمان ان الكلمه دى ضيقه وصغيره وقليلة الحيله كدا
!!!!!! !!!!!! !!!!!! !!!!!!

آه و النيعمه بجد..الحمد لله

اه والله دا بجد
وكتاب الله المجيد بجد
آه ... دبله
ودبلة حبيبى
يعنى مش مجرد دبله عشان ترضينى وبس
دى دبلة هانى ...هانى حبيبى
"ربنا يخليك ليا ويحفظك ويرجعك ليا بالسلامه يا اجمل شئ حصللى من مليون سنه"

الف حمد وشكر ليك يا رب

اللهم لك الحمدوالشكر كما ينبغى لجلال وجهك وعظيم سلطانك

"أنا محتاج أصلى و أشكر ربنا"
"ياأجمل شئ حصللى من مليون سنه"

"أنا حبيتك لما لقيتك قدام عينى حلم بعيد"
"كان فى عنيا صعب عليا بعد شويه بقى فى الإيد"

ربنا يخليك ليا يا فرح عمرى كله
و يقدرنى أسعدك دايما

فضفضات عابره

منتظره وجودك اوى

عشان احبك اوى

...الأمل

عندما نتألم بقوه
نغمض أعيننا بقوه
"وندعو الله"

فتظهر فجأه اكثر الاشياء بهجة

فنفتح أعيننا بحذر مشككين

وعندها


تتمكن السعاده من قلوبنا بقوه أيضا

:)

...فشكرا لك

هل لى أن أعتقد

غريب انت تبعث بداخلى شعور
بالراحه.. بالامان ..بالسعاده ..بالحيويه
ولكن .......... لا اعتقد انه بالحب
!!!
وكأنك هالة روحانيه يحيط بى أينما ذهبت لتحمينى من كل شرور الدنيا
فبوجودك تصير الألوان أوضح
الاصوات أنقى و الدنيا أبهى

وجودك يثير جنونى
و تأبى عينى النوم

ولكن..تبقى الحياه أفضل

فيالغرابتك..فأنا أهوى ذلك الشعور الذى تبعثه بداخلى

فشكرا لوجودك و شكرا لك

وارجو ألا تغضبك
:)